PREMIOS MARTIN CODAX 2020- I

Os Premios Martín Códax da Música Galega entregan os seus galardóns denunciando a precariedade no sector.

 

Os Premios Martín Códax da Música Galega completaron con éxito este mércores a súa sétima edición, nun ano no que o certame organizado por Músicas ao Vivo tivo que superar grandes obstáculos impostos pola pandemia de coronavirus. Finalmente, o Pazo da Cultura de Pontevedra acolleu a entrega dos galardóns, nunha cerimonia con grandes medidas de seguridade á que unicamente asistiron 60 persoas (unha por cada un dos 60 proxectos finalistas nas 20 categorías).

 Nos premios reafirmouse a forza das mulleres na música galega, resultando premiados proxectos como o de Guadi Galego, Carla Green & The Demons, Silvia Penide ou Najla Shami, por mencionar tan só algúns deles. Entre as novidades destacou o feito de que, como nas primeiras edicións do certame, a categoría de Música Tradicional e Folk desdobrouse en dúas, resultando premiado Xabier Díaz & Adufeiras de Salitre na de Música Tradicional e Caldo na categoría de Música Folk. Na gala houbo tamén tempo para a homenaxe á cantante ferrolá María Manuela, que recibiu o Premio Honorífico desta edición. María Manuela "fixo da música e da nosa lingua ferramentas para un mundo mellor”, destacouse.

 Houbo case 600 inscricións de proxectos, superando en 139 as da pasada edición. Todas as categorías aumentaron en volume de propostas, e algunhas delas chegaron de lugares tan insospeitados como Holanda, Sacramento, Cardiff, Saxonia ou Taiwan, só por nomear algúns. "Estas cifras non fan máis que reafirmar que a música galega sabe repoñerse e plantar cara a calquera situación, e que o seu potencial non ten límites", conclúe Músicas ao Vivo.

 FONTE: https://praza.gal/cultura/os-premios-martin-codax-da-musica-galega-entregan-os-seus-galardons-denunciando-a-precariedade-no-sector